Friday, June 11, 2010

A scent - იაპონური მინიმალიზმი ზაფხულში


იღვიძებ. ფანჯარას აღებ.
გარეთ გვიანი გაზაფხულის თბილი, ოდნავ მოღრუბლული დღეა.
თითქოს ყველაფერი გაქვს ბედნიერებისთვის, მაგრამ უცებ ხვდები, რომ რაღაც გაკლია. ეს რაღაც ცოტათი სუფთა, კრისტალურ ჰაერს ჰგავს, ცოტათიც - ხეების გამაბრუებელ სუნს. მოკლედ, იმას, რაც ასე გაკლია ზაფხულში დიდ ქალაქში - სუფთა ჰაერი, სიმწვანე, სითბონარევი სიგრილე.
სწორედ ასეთია Issey Miyake-ის ახალი ქმნილება, უბრალო სახელით - A Scent. საერთოდაც, ეს სუნამო უბრალოების და მინიმალიზმის პოეტური გამოხატულებაა. ისეი მიაკის ნაცნობი ესთეტიკა - ეგოს მოკლებული, გამჭვირვალე, სუფთა. სუნი ისეც იტყვის თავის სათქმელს, ყოველგვარი პომპეზური დიზაინის დახმარების გარეშე.
A Scent - ით მიღებული ჩემი პირველი შთაბეჭდილება არც ისეთი ძლიერი იყო. შესხურებისას ცოცხალი ბალახის სუნი მეცა. "კიდევ ერთი ზაფხულის "მწვანე" სუნამო ხასიათის გარეშე" - გავიფიქრე და უცებ დავივიწყე მისი არსებობის შესახებ. ერთი-ორი საათის შემდეგ საოცრად სასიამოვნო სუნი ვიგრძენი, ოპტიმისტური, თბილი, ახალგაზრდული და თან საოცრად დახვეწილი. მინდოდა მეკითხა, ვის ჰქონდა ახალი სუნამო, მაგრამ უცებ აღმოვაჩინე, რომ მარტო ვიჯექი Marie Claire-ის ახალ ნომერთან ერთად და როცა მაჯა შემთხვევით თავთან ახლოს მივიტანე, მივხვდი - ისეი მიაკის "სუნმა" თავისი საქმე გააკეთა.


A Scent-ის უკან Daphne Bugey-ის ცხვირია. მისი შთაგონების წყარო იაპონიის მთებია, ცისფერი ცა, მონღოლეთის ველური სტეპები, უსასრულო მინდვრები. უნდოდა შეექმნა სურნელი, რომელიც სიმწვანის და ძალიან სუფთა ჰაერის ასოციაციას გამოიწვევდა.
ხანდახან ხდება, პარფიუმერები ვერ აღწევენ დასახულ მიზანს. ჩემი აზრით, ამ შემთხვევაში, სუნამო უფრო უკეთესი, უფრო საინტერესო გამოვიდა, ვიდრე თავიდან იყო ჩაფიქრებული.

ზაფხულის სუნამოებს შორის A Scent ჯერჯერობით ყველაზე განსხვავებული და შეიძლება ითქვას, უნიკალურიც კი მგონია. პირველ რიგში იმიტომ, რომ საოცრად ამბივალენტურ ემოციებს იწვევს. პირველი ნოტი, რაც იგრძნობა, ციტრუსია. თითქოს მწვანე ბალახში ზიხარ და უცებ ვიღაც ცივი ანკარა წყლით სავსე ჭიქას მოგაწვდის, რომელშიც ლიმონის თხელი ნაჭერია ჩაგდებული. ეფექტი გამაცოცხლებელია, ოპტიმისტური, მთელი ეს "freshness" მთლიანად ავსებს შენს არსებას, ენერგიით გმუხტავს.. და უეცრად, მინდვრის ყვავილებიდან მობერილ სიოს გრძნობ, თბილს, ჟასმინის და ჰიაცინტის მსუბუქ, რომანტიკულ შლეიფს, რაც საოცრად გამშვიდებს, ბოლო აკორდი კი - მუშკისა და კედარის არომატი სიმყუდროვის და დაცულობის შეგრძნებას ერთდროულად ბადებს. უნიკალურია კიდევ იმიტომ, რომ ბუკეტი აბსოლუტური ჰარმონიულობითაა შექმნილი. მინდვრის სუნი, რომელიც სუნამოების უმეტესობაში მეტისმეტად მძაფრი და გამაღიზიანებელია, აქ მხოლოდ სიმშვიდის შეგრძნებას ტოვებს. აქვს სუფთა არომატი ყოველგვარი საპონის სუნის გარეშე. რაც მთავარია, მიაკიმ შეუძლებელი შეძლო, ის, რასაც ამდენი წლების განმავლობაში სუნამოებში უშედეგოდ ვეძებდი - შექმნა ზაფხულის არომატი, რომელიც არ არის მხოლოდ კრისტალურად სუფთა - ჟასმინის და ლიმონის კომბინაცია არაჩვეულებრივად რომანტიკულ შლეიფს ქმნის, ყოველგვარი სიმძიმის, სიტკბოს და შესაბამისად, თავის ტკივილის გარეშე.
მილან კუნდერამ ერთხელ თქვა: "ყველა დიდი მოთხრობა, ყველა ნამდვილი მოთხრობა, ბისექსუალურია"-ო. A Scent ქალის სუნამოა, მაგრამ თუ კარგად დაფიქრდები, შეიძლება აღმოაჩინო, რომ ნამდვილ ხელოვნებას მართლაც არ აქვს სქესი. A Scent არ ჰგავს უნისექსის სტილის სუნამოებს, მაგრამ რატომღაც მგონია, რომ მამაკაცის სხეულის ქიმიას ადვილად დაუმეგობრდება და ყვავილების რომანტიკული, ქალური სუნიც სხვანაირად გაჟღერდება. ექსპერიმენტი ჯერ არ ჩამიტარებია, მაგრამ დარწმუნებული ვარ, თუ მას თაროზე გამოსაჩენ ადგილზე დადებთ, აუცილებლად მიიპყრობს მამრობითი სქესის ყურადღებას. ყოველ შემთხვევაში, მე გაგაფრთხილეთ...


24 საათი/“WEEKEND“

11 comments:

  1. ერთი ეს სუნამო ვერ დავაჭაშნიკე, არადა როგორ მაინტერესებს ამ რეცენზიის მერე... :D
    დღეს ვიყიდე "Weekend" – ფრიად ვისიამოვნე. :)

    ReplyDelete
  2. ლოლ ტესტერი კი მაქვს სადღაც :)

    ჩემი ფრედი ხო საყვარელია? ეს ნომერი მეც მიყვარს ♥

    ReplyDelete
  3. მომწონს, ამ ბლოგის სურნელი. :)

    ReplyDelete
  4. მე კიდევ შენი ჰანა მომწონს :))

    ReplyDelete
  5. ნამდვილი არომათერაპია იყო...შეგრძნება მაქვს რომ სურნელი ვიგრძენი და მესიამოვნა..."სუნიანი" პოსტია" :)

    ReplyDelete
  6. თეო, ამ ბლოგზე წესით სულ სუნიან პოსტებს უნდა ვდებდე, მაგრამ სამწუხაროდ სუნამოების რეცენზიებისთვის ყოველთვის არ მაქვს დრო :( მიხარია, რომ მოგწონს :)

    ReplyDelete
  7. Sen ar ici rogor damexmare

    swored es bolo dReebia veZeb axal sunamos
    da zustad iseTs pirvel abzacSi rom gaqvs

    me samwuxarod didi xania maRaziebSi ver Sevsulvar aq :( Ziritadad internetidan vicer xolme :)

    ReplyDelete
  8. თაა,

    ინტერნეტიდან ვიწერ მეც, აქ ისეთი არარეალური ფასები და ცუდი ხარისხი აქვთ. მაგრამ სანამ გამოიწერ, ჩვენს მაღაზიებში ნახე მაინც ტესტერი, ზოგის body chemistry საერთოდ ვერ 'ხსნის' ამ სუნამოს : )

    ReplyDelete
  9. უნდა ვაღიარო და სუნამოს არ ვუთმობ ყურადღებას. ეს იმიტომაც, რომ არ ვიცი როგორ აღმოვაჩინო ჩემი სურნელი. იქნებ მერე რაკომენდაციები დაწერო როგორ აღმოვაჩინოთ თუკი არსებობს ასეთი რამ;))

    რაც მახსოვს , ადერ ვისხმადი "პასკტონ" , კარგად აღარ მახსოვს სახელი ,და იმის მერე ვეძებ მაგ სუნამოს, მაგრამ ვეღარსად ვნახე, არადა რაღარ მაგარი სურნელი ჰქონდა....

    ReplyDelete
  10. როდე, ცოტა რთული კი იქნება, რადგან არ მგონია ოქროს წესი არსებობდეს : ) მე მაინც შევეცდები, თავისუფალი დრო რომ მექნება )

    პასკტონ რა ბრენდის სუნამო იყო თუ გაიხსენებ, უცებ მოგიძებნი, მეტი რა ვიცი :დ

    ReplyDelete
  11. ok ;))უნდა მივაკვლიო მაგ სუნამოს, თუ რამე გამახსენდა გეტყვი ;))

    ReplyDelete