Versace for H&M

გაათენებდით ღამეს ტანსაცმლის მაღაზიის წინ, გრძელ რიგში იმისათვის, რომ რომელიმე დიზაინერის კოლექციიდან ერთი ნივთი შეგეძინათ? ნამდვილ fashionista-ს ამ კითხვაზე ალბათ ნაკლებად გაახსენდება ის, რომ ღამით გარეთ უკვე გვარიანად ცივა. პასუხი ნამდვილად დადებითი ექნება, მხოლოდ ჯერ კითხვაზე კითხვით გვიპასუხებს - რომელი დიზაინერის კოლექციიდან?

ასეთ შემთხვევაში ყველა ჩვენგანს ალბათ სხვადასხვა დიზაინერი გაახსენდება. ვიღაცას დაიან ფონ ფურსტენბერგი მოსწონს, სხვას - ლანვანისა და ჟივანშის დახვეწილი სტილი, პირადად მე ამ სეზონზე DKNY-ის კოლექციაზეც არ ვიტყოდი უარს - მოთმინებით გავატარებდი ზამთრის გრძელ ღამეს ყინვაში, მაღაზიის ვიტრინაზე ცხვირმიჭყლეტილი. არა, აბა რა სისულელეებს ვწერ. ამისთვის უფრო უმტკივნეული და ნაკლებად ყინვიანი გამოსავალი არსებობს - ინტერნეტ-მაღაზიები და ერთგული მასტერქარდი. თუმცა, როდესაც საქმე ისეთ კოლაბორაციას ეხება, როგორიც დონატელა ვერსაჩესა და შვედურ გიგანტის, H&M-ის მაღაზიათა ქსელის თანამშრომლობაა, ათასობით ადამიანი კარგავს საღად აზროვნების უნარს და სიცივეში, კილომეტრიან რიგში დგება, რომ ცნობილი დიზაინერის სამოსი H&M-ის დემოკრატიულ ფასებში შეიძინოს.

არც ისე დიდი ხანია, რაც Versace for H&M-ის ლიმიტირებული კოლექცია მთელი მსოფლიოს მასშტაბით გაყიდვაში გამოვიდა. ნოემბრის შუა რიცხვებიდან ვერსაჩეს ხელმოკლე (და არა მხოლოდ ხელმოკლე) თაყვანისმცემლებს ნამდვილი ისტერია დაეწყოთ. ეს ამბავი დაახლოებით იმას ჰგავს, რაც გასულ წელს ლანვანთან თანამშრომლობას მოჰყვა - ყველა ბეჭდურ თუ ინტერნეტის გამოცემაში, ბლოგებზე, ფორუმებზე ეს კოლექცია განიხილება. ოქტომბრის ბოლოს ორიოდე სიტყვა ამასთან დაკავშირებით მეც დავწერე, როდესაც მოდურ კოლაბორაციებზე ვსაუბრობდი. მაშინ ჯერ კიდევ სარეკლამო კამპანიით იყო შესაძლებელი ახალ კოლექციაზე მსჯელობა. ები ლი ქერშოუს ჩაცმულობის მიხედვით, ასევე იმ ფილმის, რომელშიც ანა დელო რუსომ მიიღო მონაწილეობა, ამ თანამშრომლობაზე მხოლოდ სასიამოვნო ემოციები მიჩნდებოდა.

ახლა, როდესაც კოლექციის თითოეული ნივთი თავისუფლად შეიძლება ვნახოთ კომპანიის და კიდევ ათასობით სხვა ვებ-გვერდზე, პირველი აზრი, რომელიც შეიძლება ზოგიერთ ჩვენგანს გაუჩნდეს, ისაა, რომ არა მხოლოდ ღამის სიცივეში, გრძელ რიგში დგომა თბილ მზიან დღესაც კი არ ღირს. ეს მაშინ, თუ რაციონალური აზროვნების ძალა შეგრჩა. არადა, ეს ხომ თითქმის შეუძლებელია, როდესაც ვერსაჩეს სახელი გესმის. ალბათ სწორედ ამით იყო განპირობებული თვალუწვდენელი რიგები H&M-ის მაღაზიებთან. როგორც The Guardian წერდა, ლონდონში რიგის სიგრძე ბითლომანიის ასოციაციებს იწვევდა. პოპ-კულტურის ფენომენის მნიშვნელობა სწორედ რიგის სიგრძით უნდა განსაზღვროო, ამბობდა ავტორი. როდესაც პირველ მყიდველებს თავად დონატელა ვერსაჩე იღებს, ამ ფენომენმა გაურკვეველი სახეც შეიძლება მიიღოს - ვერ გადაწყვიტო, რომელი უფრო გინდა, ცნობილ დიზაინერთან ფოტოს გადაღება თუ მოდური სამოსის შეძენა.

ასეა თუ ისე, უამრავი ხალხი მაღაზიებში სწორედ სამოსისა და აქსესუარების შესაძენად მივიდა. მყიდველებს ნაწილ-ნაწილ უშვებდნენ, ამასთან, მხოლოდ ათი ან თხუთმეტი წუთით. თითოეულ მათგანს მხოლოდ ერთი ნივთის შეძენის საშუალება ჰქონდა. ამით კომპანია შეეცადა, რომ გადამყიდველების რიცხვი მინიმუმამდე შეემცირებინა. მიუხედავად ამ ფაქტისა, მოგება, რა თქმა უნდა, მაინც უზარმაზარი იქნება, რადგან მოდით ნაკლებად გატაცებული ადამიანებისთვისაც კი, ამ კოლექციიდან ნივთის შეძენა, მითუმეტეს ასეთი თანხის სანაცვლოდ, ძალიან სასურველია. თავად განსაჯეთ, ვერსაჩეს დიზაინის საყურე ან ბეჭედი სასაცილო თანხაში, სულ რაღაც ოციოდე ამერიკულ დოლარად შეიძლება, ლეგინსების - ოცდაათად...

სხვა საქმეა, ღირს თუ არა ამ ლეგინსში ოცდაათი დოლარის გადახდა. თუ კოლაჟის სტილში ვცდილობთ ჩაცმას, ღირს, სამაგიეროდ, რთულია მოიფიქრო, რასთან შეიძლება ლეოპარდის პრინტიანი ქვედაკაბის ტარება, რომელზეც მზის ჩასვლის ვარდისფერი პეიზაჟი და პალმებია დახატული. იგივე შეიძლება ითქვას კაცისთვის განკუთვნილ ჭრელ პალმებიან მაისურზე. გრძელი წითელი კაბა, ალბათ, კარნავალისთვის თუ გამოდგება, შავი ტყავის პალტო კი მხოლოდ ფეტიშის სტილის განწყობის შესაქმნელად, აქაც სიფრთხილეა საჭირო, რომ მოდურ ტენდენციასა და ვულგარულობას შორის არსებული ზღვარი სწორად დაიცვა. თუმცა, კოლექციაში საინტერესო ნივთებიც გვხვდება, მაგალითად, შავი ტოპი, კაცის ტყავის ფეხსაცმელი, შავი და ყვითელი მოკლე კაბები, რომლებიც კარგი არჩევანი იქნებოდა კლუბისთვის და კოქტეილისთვისაც კი, სამკაულები... სტილის კარგი გაკვეთილები შეიძლება ავიღოთ წვეულებაზე ამ კოლექციის სამოსში გამოწყობილი ბლეიქ ლაივლისგან, უმა თურმანისგან... თუმცა ყველაზე კარგად ასეთ ჭრელ სამოსს, ალბათ, ნიკი მინაჟის სტილის ადამიანები თუ მოირგებენ.

      

  

მაშინ, როდესაც ვერსაჩეს კოლექციასთან დაკავშირებით ატეხილი ხმაური ჯერაც არ ჩაწყნარებულა, H&M ახალი კავშირების თაობაზე იწყებს საუბარს. ახლახანს ცნობილი გახდა, რომ მისი მომავალი მოდური კოლაბორაცია იტალიურ ბრენდ Marni-სთან შედგება. ახალი კოლექცია მაღაზიებში უკვე მომავალ გაზაფხულზე, რვა მარტიდან მოხვდება. "მინდოდა შემექმნა ნამდვილი Marni-ის გარდერობი, ამიტომ მივმართე ჩვენს საყვარელ ნივთებს, საფირმო პრინტებსა და ქსოვილებს. როგორც ყოველთვის, მე ახლაც მომწონს განსხვავებული პრინტისა და ფერის შეხამება, tribal სტილის თანამედროვე ინტერპრეტაციისა და Bauhaus-ის განთქმული გრაფიკის სპორტულ ელემენტებთან კომბინირება", - ამბობს მარნის კრეატიული დირექტორი, კონსუელო კასტილიონი და ახალ კოლექციაზე მუშაობას ამაღელვებელ გამოწვევად მიიჩნევს. თუ უკვე გავრცელებული ფოტო და ვიდეო მასალით ვიმსჯელებთ, ამ შემთხვევაში ნაკლებად გვაქვს საქმე ფსევდო გლამურთან, რომელიც ასე თვალშისაცემი იყო ვერსაჩეს კოლექციაში. სტილი უფრო ახალგაზრდულია, მეტად casual, თუმცა მარნისთვის დამახასიათებელი სენსუალიზმი და უბრალოებაც კარგად იგრძნობა. იმედია, მომავალი კოლექციის დასრულებული სახეც ასეთივე შთაბეჭდილებას დატოვებს.

ისე კი, როდესაც უყურებ, როგორ კვდება მაღალი მოდა, ხოლო სწრაფი მოდის ინდუსტრია ეკოლოგიურ და ბუნებრივ რესურსებს დაუნანებლად ხარჯავს მასობრივი პროდუქტის წარმოებაზე, ეს უკვე სერიოზული დემოტივატორია, რომ არც ისე ხარისხიანი სამოსის შეძენის მოლოდინში მაღაზიის კართან ღამე არ გაათენო...